fbpx

Endik laikung pan – AD001

Agape Digest hong piankhiat theihna dingin lam hong lak, hong mapi le hong makaih i biak Pasian tungah lungdamna i ko masa hi. Leikha’ pet bangin hong phuangkhia Sia Sawm Thang le Sia Thangnote tungah lungdamna i ko hi. Lai hawmkhiat theihna ding phalna & panpihna hong pia pawlpi boardmembate tungzong lungdamthu ipuak hi. A gim a buai Agape Digest tanute zong Topa’n thupha tawh hong thuk kik ta hen. A sim ding le hong panpih ding akua mahpeuh tung zong Topa’n thupha hong pia kimta hen. Amen.

Hih labu i hawmna pen deihna le ngimna 3 om hi.

1. Kha, lungsim le taksa khantohna ding thute Zolai tawh kisim thei ding
Zolai sim thei khempeuh in amau theih Zolai tawh ki-at kha thu, lungsim le taksa khantohna ding thute a baih lamin a ngah theihna ding pen i ngimna masa ahi hi. Kawllai Mikanglai tawh tua thute sim ding a tam hangin, ei lai tawh kigelhte mah sim nop telnop zaw hi. Zong hong bunzawkna om kha thei hi. I teldan zong kibang lo thei hi. Bektham lo-in Zolai bek a sim theite adingin hih laibu pen khuavak lutna kongvangneu bang hong hih ding zong i lametna khat hi.

2. Lai lam tawh Pasian’ nasep tangzai sakna ding
US Zomi pawlpite sungah kei theih ciangciangin laihawm tawh Pasian nasep a sem kitawm mahnah hi. Onlinete ah sim theih ngaih theih et theih ding tam mahmah ta leh, khat veivei hun ngah lo, internet line hoih loh (leh) mit cidamna ding fon a ngawl a tangte pawl khat adingin a baihsa aa nek theih pah dingin a koihsak nuam zong ihi hi. Pawlpi ii mission nasep zong lai lam pan panpih nopna le Zomi sungah lai le thu tawh nasep a tangzai semsem na ding ngimna zong ahi hi.

3. Khangthakte’ simtheih ding Zolai tawh kigelh lai (thu) a om den theihna ding
Khangthakte sim ding Zolai tawh ki-at laibu om leh, a thu theihna bek khang lo-in a Zolai theihna tawh khangkhawm ding deihna ahi hi. Zolai a puah, a zuunkawm zong ihi hi. Khang thakte Zolai a hilh kawm zong i suak hi. Zolai tawh kihawm lai magazine ai zong, tua lo laihawm limlim tam hetlo hi. Zolai theisa i khangthakte in a sim ding uh om kei leh, a theihsa uh hong mangngilh ding uh hi. Tua idalna dingin amau sim ding Zolai tawh ki-at thuhoih tuamtuam laibu tuamtuam a om ding kisam hi. Tua mun ah i laibu in mun khat ah panmun hongla ding ngimna ahi hi.

Tutung pen amasa pen ahih manin kicing lohna, laimal khialhna tuamtuam om kha ding ahih manin laisimmi a kuama peuh in nong telsiamna ding uh kong ngen uh hi. Thului le teci panna hong puak nuamte kingah hi. Sum le paii tawh panpih nuamte bel kinial lo ding hi. I laibu pen khasim kal masa Nipi ni ta-in hawm dingin gelna om ahih manin thungetna ah zong hong phawk un.
Khrihmas thupha lungnopna, suahtakna, hih laisim mikim tungah hong tungta hen. Amen.

Endik pawl

Post a comment

This site uses Akismet to reduce spam. Learn how your comment data is processed.

Print your tickets