fbpx

Endik laikung pan – Agape Digest No.3

February kha sungin ei adingin ni thupi thum om hi. Khat pen Zomi Nam Ni hi-a a dang khat pen Valentine’s Day hi-in a tawpna pen Presidential Day hi. Zomi Nam Ni pen 1948 February 20 ni, Zomi bup Falam khua ah mi 5000 va kikaikhawm-in a suakta mihing hihna (Freedom & Human rights) tawh kizui-in amau deih Dimukrisi ki-ukna telin, siahtung siahphei a kai ukpi ngeina tawh ki-ukna phiatsiang dingin kipumkhat-in i khensat Ni ahi hi. Eite ading mangngilh theih ding Ni hilo hi. Hi bang nite cikciang a om kik diam cih gen theih om nawn lo hi.
A nihna Valentine’s Day hi. Pope in siadaw Valentine pen misiangtho a AD kum zalom 5 lai-in ciaptehin Feb 14 pen biakna pawi khatin kipsak hi. Hi mah leh, 1969 kum ciangin hih misiangtho Vanlentine pen a kua lian hiam cih kithei cian lo ahih manin biakna kalendar pan phiat khia kik uh hi. Ahi zongin leitung mun tuamtuam ah ki-it kingaihni-in kibawl kiciapteh lai hi. Eimite sungah khangno lamte bek in kithei kizang hi. Lawm kingaite’ Ni danin kituat hi. Malaysia ka om lai khatin ka sim khak news sungah Valentine Ni-in “No Panties” campaign kibawlin tua kum valentine ni-in lawm kingai numeite in a lawmpate uh a itna a lahna-in bombi sungten teng lo ding, cih ahi hi. A kisawk dan a lem a manlang ding a ci uh hizen hi. Itna pai khial cih ding hi.
A tawpna pen tukha 21 hi-in Goerge Washington’ Suahni hi. I tenna igam makai masa penpa hi. A nunglam ciangin President khempeuh pahtawina ci leuleu uh hi. Gam hong makaih President khempeuh pahtawini cih ding hi. Etteh huai mipil makai vive ahih manin a tangthu uh kan a pilna lak ding ahi hi.
A tunga nite pen abeisa huna mi thupite pahtawina vive hi. A pahtawi bek hilo-in phawkin amau tangthu kanin etteh thei ding cih deihna a ni thupi-in a kiciamteh ahi hi. Gualnopna ding ciang bek hilo-in tua tangthute pan pilna la-a mailam kalsuanzia ding theithei ding deihna ahi hi. Gam itna ding, khat le khat ki-itna ding, le hanciam nopna ding cih ngimna tawh phawkna kibawl “Ni” te ahi hi. George Santayana in “A beisa thu a ciamteh lote in a khialhngei mah khial ding hi” (Those who do not remember the past are condemned to repeat it.), ci hi. Leing tung thu hita leh, Upna thu ah hitaleh, tua dan mah hi. Minam vai ah, kha thu ah a beisa ikhialhnate i mangngilh khak leh, tuate mah i sem kik kha thei ding hi. Tua manin thangthu pen kan huai theih huai ciapteh huai hi.

Post a comment

This site uses Akismet to reduce spam. Learn how your comment data is processed.

Print your tickets