fbpx

Khrish ading Mi Hangsan Sia Kap tawh dotna dawnna

February kha, dotna dawnna khawk adingin i mission sia ahi Sia Thang Za Kap na telkhia ung. Ama thu pen i theihsa ahih hangin lai tawh kician takin ciaptehna lian om nai lo ahih manin, Agape Digest in siapa tawh dotna dawnna na bawl thei ung. Sia Kap in aw (Recorded audio) tawh hong dawng kik hi. Hun hong pia Sia Kap tungah Agape Digest in lungdamna i ko hi. 

AD= Agape Digest

KP   = Sia Kap Pi AD: Sia Kap, nang bel hong kithei kim tek khin pian in kimetsetna hih nawn kei ni in, i thukidotna ah pai suak pah ni. Amasa penin, hunbit sia na sepzawh kum bangzah pha ta a hia?

KP: Dec.1976 kum in Pasian’ nasep ka kipan a, hun bit a kasep zawh kum (45) cing khin hi. Tu’n kum (46 )na ka sep laitak hi ei. 11,March,1977 ni-in Lophei khua ah Rev. Myo Chit in hunbit Pasian nasem dingin hong khan hi. Tua hun lai-in pawlpi picing nailo ahih manin, Yangon pan kha khatin 150 ks tawh kum nih sung tawntung hong huh uh hi.

 

AD: Sia Zel Chuau (Tiau) tawh hong kimat sawm vai nong gen dia?

KP: Thuklai ah Pastor ka sep laitak hi. 1993 kumThuklai pawlpi a ding Kawlgam sung mun tuamtuam ah huhna ngen a ka pai laitak hi. 5 Dec. 1993 ni-in ciahto-in, Tahan a ka sanggamnu’ inn ka tun ciang, palik ( ထောက်လှန်းရေး) te’n kei mat dingin hong zon’na thu hong gen hi. Tahan biakinn cingpa , Rev. Go Za Nang, le Rev. Daniel Khen te zong thusit thuak dingin zum ah na kisam khin hi. Tua thu ka theih ni a zingciang, mi’ mat pung tin tawh Monywa (မုံရွာ) lam manawh in ka sanggampa kiangah kha khat ka om hi.Tua pan Myitkyina AG (မြစ်ကြီးနား) a ka tintan piak ngeinate kiangah pai-in ka vaiteng ka gen ciang, amau (10000ks), Moe kok(မိုးကုတ်)AG pawlpi te’n (10000ks), le Sagaing (စစ်ကိုင်း)pan hita leh hong kihuhna (30000ks) ngah ing. Tua teng tawh kei pen Tonsim, India dong va tai to suak thei ing.

Jan 15, 1994 nitak a Tahan pan ka khua Lophei ah ciah to-in lam kal ah ka motaw uh (3) vei hong sia hi. Hiangzing ka tun uh ciangin motaw (Engine) hong khia in tua pan pai to in, zingsang (3am) ah Taaingen ah tungin ka motawte tua mun ah giak sawm pah ahih manin kei kia bek khe tawh tai 3 gamlana Thangmual ah zingsang khua vot daikai nuai ah na pai ing. Thang mual le ka khua pen tai 5 ki gamla a, ka khua ah ka tun ciang, palik thukante hong man ding te ka khua ah na om ta uh hi. Kei zong palikte ka muh ciang tai to vingvengin Khuasak ah zan 3 tamin, Khuasak pan Vangteh, Vangteh pan mehthuk seng dim khat pua-in tua teng tawh Tonsim va tai to in, baih vetlo hi. I zogam lampite pen i theisa mah bangin lamsuk lamto tam mahmahin lamsuk tai 7 le lamto tai 10, Vangteh, Saizang, Gun, Laitui khuate le a dang khua tampite ah mehthuk sengpi dim khat tawh ka nawt khit teh Tonsim pen Jan 14, 1994 ni- in Pasian’ hehpihna tawh na tung thei ing.Tonsim ka tun ciang tawl lua-in si dektak ka hih manin kal 2 tamin, tawm ka hoih deuh ciangin Aizawl lam manawhin Pastor Zarate kiangah tungin amau ka dam dong hoihtak hong kem hi. Sia Zel Tiau pen amah na tai suak pahlian ahih ciang a, Tonsim, India ah tung pahin amah a ding bel patau huai lo-in, kei bel ka hih leh hong man kha lo bek hi mai ei.

 

AD: Tua laibu pen nang at ci leng, tua laibu sunga Kumpi lamte’ zakdah pen uh, bang lian ai tam..

KP: Tua laibu sungah, “Jesuh le Gautama Buddha tehkakin

Gautama Buddha na neuseek(စော်ကား) hang hi,” hong ci uhhi. Thukhen mangpa in thu hong khenna (Sentence) ပုဒ်မ၂၉၄(က)အရ kha 6 ahih kei leh, liausum 1200 ks piak ding hong teelsak hi. Tua bangin ka teel theihna dingin 250000ks amau golhguk na pia ing. A tawpna ah liausum 1200ks tawh zumvai a siang thei hong suak hi.

 

.AD: Tu in tua bang lai atna hanga kimat kihenna hong om kik leh, na at veve lai tam..

KP: At veve peuh mah inah kei pen 1994 kum in India gam ah a tai hi-in, Kawlgam ah 2001 kum a hong ciahsuk kikin ka vaiteng siangin, tua teh Kawlgam thukante hong ki phiat ta a, 2005 kum in laibu khat at kik thei pah ing. 2006 le 2007 kum sungin laibu 4 bang na at kik ing. Tua laibu thulute pen ငရဲသွားမယ့်သူများ လွတ်ရာလမ်း (Hell pai dingte suaktak na ding lampi)” cih khat, A dang khat pen ဝိညာဉ်တော်ငြင်းပယ်ခြင်း ဆိုတာဘာလဲ (Kha siangtho nial i cih pen bang hiam?), “ Tehpih theih om lo Jesuh Pasian”, le  “Vantung tun’na ding kal 4″ gelhin tua bang bu 1000 bang zuak ing. Palik te’n mat dingin hong delh ma-in bu 4 at in, tua khit teh bu 5 at kik ing. Lai bu ka at khempeuh bu (9) hi ta ei.

 

AD: Abeisa hun bang, kila kik thei hi leh, hong kimat sawm lai-in tai lo zawin kimat thuak ding na teel zaw tam.

KP: Tua hunin kum (39) pha ta ing. India ah ka tai na i a manphatna :

  • Aizawl ah Salom AG pawlpi kici-in, tu’n Mizogam bup AG pawlpite sung pan pawlpi lianpen hi-in Pasian in kei hong zatna le hong ompihna tawh tua pawlpi khat va phut zo ing.
  • Bangalore ah laisiangtho sang va kahin, M.Div. (Master of Divinity Degree) na ngah ka hih manin ka tai pen manpha sa mah mah ing.

 

AD: India gam sunga Pasian’na nasepna pawl khat nong gen thei dia.

KP: India gam sungah Pasian nasep na a kician pen ahih leh Aizawl khuapi a Salom AG pawlpi pen Pasian in kei hong zangin tua lai ah pawlpi khat a kidingkhia suak hi. Kei pen 1994 kumin galtai tungto in, tua khit teh Bangalore ah Lai Siangtho sangkah ing. 1996 kum February 16 ni ah M.div. Degree la-in tua pan Delhi ah ciah kik ing. Delhi ka ciah khit teh Aizawl ah va zinto in, nitak khat ka zintun’na ah Pa Cin Sawn Pau le Pa Pau Kel te vaihawmna tawh Durtlang Bible camp ah October 17, 1996 kum Tedim mi (20) val khawng Gupkhiatna deihtaka tentan pia in, Pasain’ hehpihna tawh Gupngah hong kitel uhhi. Tua khit ciang, a mau (ZBA ) (ahi kei leh) (ZBC) tua pawlpite’n hawlkhia-in ka omna ding uh om kei, bangbang hita leh, pawlpi khat nong phut kei le, ci-in 1996 kum a ka put hi in Pasian i thupha hong pia hi. Aizawl ah inndawl li Biakinn dingin lei-in, tuni dong Topa’n ompih mahmah a, pawlpi mi zong tam mah mah ta hi.

2021 kum in kum(25) cinna Jubilee zong bawlin, kei zong kei patkhiatna pawlpi ahih cianga 500$ khak ing. India gamah Pasian nasepna tua mah a lianpen hi, ci ing.

Tua lo bel Falam, Lai Christian Fellowship, Halkha pawlpite khawng ahzong hun zang kawi kawi ing. Tonsim ahzong hun zangin, Mizogam state mun tuamtuam ah zong tentan pia in, ka zi zong Kawlgam pan khat vei hong hawhto in, ka nupa un mun tampi ah Bus tawh Gupna thu tintan pia-in va pai kawikawi ung. India gam ading Pasian min tawh ka nasepna tua dan hi.

 

AD: Facebook pan na thugenna hanga RC, UPC le SDA-te’n zadahin heh mahmah napi un, bang hang gen veve na hia?

 KP: Hih pen thupi  mahmah hi, ke’n  SDA, RC le UPC upna tawh kisai ka gen zelna thu pen ka kona lah hi kei, ka tona lah hi kei, ka simmawhna zong hi kei. A updan, a kalsuanzia uh Lai Siangtho tawh kituak lo lua mahmah ahih manin, ka deihsakna tawh ka gen hi. EZEKIEL 33:3‭-‬6 “Galvil pa in galte hong pai a muh ciangin mi khempeuh a theihsak nadingin pataukohna peengkul tum hi. Mi khatpeuh in tua pataukohna za napi-in don loin a ommawk a, a galte hong pai-in tua mipa a thah leh, ama sihna pen amahmah ngawh ding ahi hi. Amah in pataukohna za napi-in don lo ahih manin, ama sihna pen ama khialhna hang ahi hi. Thudon hileh amah a suakta ding ahi hi. Ahi zongin galvil pa in galte hong pai mu napi-in pataukohna peengkul a tum kei a, galte hong pai-in mi a thah leh, tua a site amau’ mawhna hangin a si hitaseleh galvil pa ka ngawh ding hi” ci hi. (TDB)

 

Tua ahih manin, ka thugen a sangnop uhleh sang hen! A san zawh kei uh leh zong ka meetna thu nih om.

1, Gen khin limlim ka hih manin Pasian mai ah ka nasep ding a khin hi’ng. 

2, Amau danin midangte a paikhialh lohna dingin ka dalkholhna hi pah hi. 

 

AD: Pasian nasepna sungah haksa na sak pen..

KP: Pasian nasep pen baih vetlo hi. Kawlgam sungah ka seplai bang Lovegifts cih lah ki theilo, annek tuidawn haksa lua a hihman in ka pa ka nu i singbuk sikkang na ngawn a zuak ngei hi mai ing. Pasian nasepna sungah Sum le paii kicinlohna, nek le dawn kicinloh mah haksa sapen ing.

 

AD: Tu lian bangin Kawlgam ah hunbit Pasian nasemte bang, mat le hen thuak ding uh hi leh, amau zong gamdangah a tai ding uh na thukim maw…bang hang?

KP:Pasian min tawh thong sungah kumpi te kepna nuai ah om hileng mite’n hong zahtak(Respect) tuam ding uh hi. Tua thaman zong Topa’n hong pia inteh. Pasian in thonginn sungah Ama’ nasem dingin hong koih a hih leh, tua pen thu tuamkhat ci ni. Ahi zongin kei mimal muhna ah thong inn sungah i om sang a pua lam ah hi leh, suakta tak le tangzai zawin na kisem thei zaw tham hi. Kei zong India ah Pawlpi phutin Laibu tampi gelh man ing .

 

AD: Pu lengtong kam Khen in pahtawina laidalpi hong piakna a hang nong gen thei dia ?

KP: Ama hong piak pahtawina lai tungah (ခရစ်တော်အတွက်လူမိုက်ဘွဲ့ ) ci-in na gelh hi. Ama gen nop pen, “Jesuh ading Galhang” a cihnop na hi zaw inteh. Mi’ sep ngamloh, mi at ngamloh, Online pan hi ta leh, mi gen ngamloh tampi tak genkhia ing. Mi tampi takin zong hi bangin ka genkhiatna hangin thupi le hangsan hong sakna uh. Lai tawh hita leh, kam tawh ahi zongin hong gen thei uh hi. Ka tu ka ta khang  ading zong ka kepsuak ding pawl hi ei, lungdam.

 

AD: Laibu thak khat bawl, cih na genna za ve’ng. Tua pen bang lam tawh kisai hi pipen ahia..

KP: SDA, RC le UPC upnate Laisiangtho tawh sittelna hi. Lai Siangtho le lai tampi tak sim a, ka bawl hi. Hih pawlpite ii upna aman lohna zia le Lai Siangtho tawh a kituak vetlona thu tampi (Facts) kaikhawmin ka at hi.

Gentehna: Lai Siangtho in Sabbath bei khin hi, ci napi-in amau Sabbath om lai, ci uh hi. UPC te’ upna ah Jesuh bulphuh mahmahin Pa, Ta, Kha siangtho min kihello, Jesuh’ min bek tawh tui i kiphum kei leh van gam tunglo ding cih ahi zongin, kamtuam paulote vangam tung lo ding cih a hi zongin, hoih takin hilhcian ing. RC te’ upna leuleu ah Jesuh bek siampi kimlai, amau siampi kisa in Topa Jesuh sep ding teng amau in semin mawhsut mawhphel cih peuh zang uh hi. Hih bang upna a manlohnate uh Lai Siangtho le amau ngiat ii gelh laibute ahi zongin, laibu tampi tak simin ka bawl khiat hi a, a zo kuankuan hi ta ing ei.

 

AD: Hih banga hun nong piak lungdam ei, sia. 

KP: Lungdam.

Post a comment

This site uses Akismet to reduce spam. Learn how your comment data is processed.

Print your tickets