fbpx

Khrishmas hong pianna thu – Khaipi

Khrihmas ni pen Khristiante bek hi lo, leitungbup ii zumkhak ni thupi khat ahi hi. Pawi tuamtuam kibawlin nasia takin kidawn hi. Mikang lai-in “Chrismas” cih pen Spanish-in Navidad, Pintitte’n Noel ci-in a khiatna pen Phalbi Pawi (the feast of Winter Solstice) cihna ahi hi. Zomite’n bel Lungdam Bawl le Khrihmas cih izang pen hi.
Laisiangtho sungah December 25 in Jesuh suak hi, cihna lian om lo hi. December 25 ni-in Jesuh Suahni hi, ci-in Khristian tangthusiam Sextus Julius Africanus in AD 221 kumin na ciamteh masa pen hi.
Pawlkhat’ genna ah, Romte in Khristian a suah uh ciangin, amau gama Ni pasian pawi ni ( dies solis invicti nati ) pen Jesu suahni a khek (laih) uh hi ding hi, ci-in um uh hi. Adang pawlkhat in, Leitung piancial a ni 4 ni in Ni leh khuavak kipiangsakin, tuate nih tawh a kibang Jesuh pen Mary in tuani (March 25) a paii cilni-in sim leng, tua ni zawh kha 9 (Dec 25) hi ding hi cih um uh hi. A kituiphumni pen Jan 6 in ciaptehin pawi bawl uh hi. Eastern/Greek Orthodox leh Armenian Church-te in Jan 6 ni in Khrishmas bawl uh hi.
Khristian masate in suahni pawi bawl pen dawibiate zia hi ci-in Khristmas bawlnuam lo uh hi. Hih gam saat masa Puritan le Quaker-te in suahni pawi bawl pen dawivai lawki vai hi ci-in upadi tawh khamin, 1870 ciang bang Khrismas pawi bawl peuhmah sum gap tuak uh hi. Tuhun ciangin, bawllua kisa-in zulesa tawh nuamsa in a Suahni nei pa bang mangngilh kha phial hi hang. US bangah mawtaw kitaiha si a tam pen ni zong ahi hi. A nihna pen Kumthak nizaan hi-in, Thanksgiving ni pen a thumna hi. Kawlgam lasiam minthang Mi Mi Ge lasa khat ah “Khrishmas ko kyauk louh ngu de”, Khrismas lau-in kap ing, ci hi. Eite ihih leh, a lua lo leh Jesuh suah hanga a lungdam takpite ihih ding phawk ciat ni.
Bibliography:
Hillerbrand, Hans J. “Christmas | Origin, Definition, Traditions, History, & Facts | Britannica.” Accessed October 14, 2021. https://www.britannica.com/topic/Christmas.
McGowan, Andrew. “How December 25 Became Christmas – Biblical Archaeology Society.” Accessed October 14, 2021. https://www.biblicalarchaeology.org/daily/people-cultures-in-the-bible/jesus-historical-jesus/how-december-25-became-christmas/.

Post a comment

This site uses Akismet to reduce spam. Learn how your comment data is processed.

Print your tickets