fbpx

Minam le Lai – T. Sian Pum

“Simbeng zong kim citciat tangzang kiguan,” a cih paunak I neih mahbangin pawlpi mi mipil misiam tampi a om khawmkal pan Agape Digest sung, “ Zolai Sinna” cih thulu nuai ah thu kaikhawm dingin sungah kicinna bangmah aneilo kei vaipuakna nong piakna uh tawh kizui-in, tutung amasa pen suahsak dingin “Minam le Lai,” cih thu kong guanga, mailam ah Zolai sinna tawh kisai zom toto ding hihang.

Minam le Lai pen khentuam theih hilo hi. Mi na om masa a, tua mi suanlekhakte tampi hong phak ciangin minam khat in hong om uh hi. Tua minamte in khat le khat kihona leh nate minlawhna na nei ciat uh a, tua pen Pau ahi hi. Tua paute ciamtehna dingin Lai hong piang ahi hi. Tua ahih manin Minam, Pau leh Lai cihte pen tuamkhen theih hilo hi. A awlmawhlo a omkhaphial zongin mi a I pian khit nungsangin Minam, Pau le Lai kineiciat ahi hi. Sia Do Khup in; “Pau tampi theihna pen pilna hi-a, ei pau theihlohna pen haina hi,” acih mah bangin mi a I pian khit nungsang in I minam hihna, Pau le Laite atheibek hilo in I zattheih ding ahi hi.

1. Minam
Minam tawh kisai in pianna Pupi min tawh kilo minam a ommah bangin tenna munlemual min tawh kilo minam zong ki-om hi. Israel-te a Pupi uh Israel(Jacob) min tawh Jacob ta 12te suanlekhak khempeuh kisam/kilo uh hi. Tenna Mun le Mual min tawh kilo minam pen gentehna in; Tedim minam, Falam minam, Khalkha minam etc. cite ahi hi.

I kammal Zopau bulphuh in en hile hang Zomite in Minam I cih pen Mi pan apiangte mah hizaw kha ding hi. Pu Zo I suanlekhakte ganhing singkung lopa na hisamlo in mihing mah a nahih man un eizong Israelte mahbang in Pu Zo I suaklekhakte peuhmah ZOMI a kilo/kisam I hi hi. Munlemual zui a kilawhna pen adiak in Kawlgam dinmun ah, gammite hong thupisimna uh ahihsangin “khenzak gawp in neusek a Ukcipna, ” (Divide and Rule policy) hizawkha ding hi.

Banghang hiam cih leh Kawlgam ah khamtung gam danin Yangon miman, Mandalay minam, Pego minam etc. cih bang omsak hetlo napi un Zogam ah khuapi min teng minam min hong suaksak uh a, tua sungah en akee tampi kiphasak sawnsawn in I ki-ultungsak a, kilomkhat in minam lian ahi ding kimlai kikhenthang in a nengeng I kisuah hi.

2. Lai
“Lai” le “Pau” pen tuam khentheih loh ahih hangin hih I zat “Lai”, hih le “Pau” azang tengbek Pu ZO Suan, Zomi cihna hituanlo hi. Ahizongin hih I zat Lai le Pau pen Zomite a dingin Topa hong piak “Pau le Lai,” hi-a, khangsawnte’n I puah, I zun, I zat ding ahihna a gennuam I hi hi.

2.1. Tedim khua ah Zosuan sungpan pau awkaih tuamtuam azangte hong tenkhopkikna pan un pauthak khat hong pianga tua pen Tedim pau kici hi.

2.2. Mangkang kumpi hong khan ciangin Ukpi tuamtuak ahi Sihzang Uk, Sukte Uk, Kamhau Uk, hih Uk thum teng gawmkhawm in Vuandok zum Tedim ah phut uh a hong ukna pan un Tedim mi cih hong piang hi.

2.3. 1919 kum in Cope Topa in Tedim Vaundok Uk sunga om mite Sang Lai sin ding leh Lai siangtho teina dingin “Pau” mi kim in atheih, a zatkim theih pen ding hong kan hi. Zosuante sung pan in pau awkaih tuamtuam azang khua hausate Tedim Vaundok zumah samkhawm in kikupna aneihna uh pan in, Tedim Pau zat ding kithukim uh hi.
Tua thukimna tungtawn in Cope Topa’n Tedim Pau in Lai hong bawlsak hi. Tua lai tawh Sang Lai sin ding hong bawlsak in hong sinsak a, Lai siangtho zong hong teisak hi. Tua Tedim pau zanga kibawl Lai pen, “Zo Lai,” kici a, tua lai tawh kigelh pau pen, “ Zo Pau,” kici hi.

3. Thukhupna
Minam leh lai tawh kisai in Zomite sungah thu sutzia, pau le lai zatdan atuamtuam omkha mah ding hi. Ahizongin PU ZO suan ZOMIte sung pan Pau awkaih tuamtuam akigawmkhawm Pauthak khat hong piankhia cih pen a piandang thukhat ahi hi. Bekthamlo in PU ZO suan Zomite sungpan in awkaih tuamtuam a zangte Cope Topa tawh kikumkawm uh a, pau dang a-upa zaw tampi om himah leh apiangtawm pau khat taangkam (common language) a zat ding akithukim uhzong thu ladang ahih banah alamdang phadiak pen in Zo Pau, Zo Lai pen Lungdamna Gospel thu tungtawn a hong luangkhia pau le lai ahihna ahi hi.

Tua ahih manin Zo Pau, Zo Lai I cih pen Pu Zo Suan pau awkaih tuamtuam azang Zomi Pulepate in pautaang/ taangkam (common language) ding a athukim uh Pau le Lai ahih manin Gam leh Minam a it aveite in puah in, zun in I zat ding ahi hi. Tu a mah bangin Zo Pau, Zo Lai I cih pen Pu Zo suan pau awkaih tuamtuam azangte tungah Lungdam Gospel tungtawn a hong luangkhia Pau le Lai ahih manin Zomi piangthakte in I puah, I zun, I zat ding ahi hi.

Etkhak laibute :
* 1. Tedim BEHS No.1, Golden Jubilee Magazine
* 2. Zomi Christian kum 100 mual suang
* 3. Dr. Mang Do Thang (online)

Post a comment

This site uses Akismet to reduce spam. Learn how your comment data is processed.

Print your tickets