fbpx

NA KHEMPEUHAH NOPSAKNA LEH CIDAMNA NGAH KUM – Rev. Tuang Lian Khai

“Ka it mi aw, na lungsim a nopsak mah bangin nangmah in na khempeuhah nopsakna leh cidamna na ngah nading thu ka ngen hi.” 3Johan. 1:2 (Hilhcianna)

 Kum 2021 hong zawhpih Topa tungah lungdamna ko masa hang. 2021 hong zawhpih mah bangin, 2022 zong, na khempeuhah nopsakna leh cidamna ngah kum ahi dingin, upna tawh ipulak hi. Amen.

Pasian in thu-um mite, nuntakna ah cidamin ama thuphate tawh i kidim ding hong deih hi. Na khempeuh icih takciangin, Pasian  nasepna, Company nasep na, sangkahna, inn ngakna, geelna, vaihawmna, i bangkim ah Pasian’ lamlahna tawh lawhcin’na ngah ding cihna ahi hi.

Leitung ah sum hau-in, nuamsa napi, dahna le gimna, lungkhamna le lunghih mawhna tawh a nungta mi tampi tak om thei hi. Pasian’ thupha taktak icih in, Pau. 10:22 na sungah, “Topa’ thupha in mite hausak a, dahna le gimna tawh piakhawm lo hi.” ci hi.

 

LUNGSIM NGAIHSUTNA BAWLTHAK NI (Rom. 12:2; Pau. 4:23; Luka. 6:45)

“Kumthak” icih mahbang in, kum bek thaksak lo in, nuntakna thak, lungsim ngaihsutna thak tawh i lim kilamdangsak ding hi hang.

Nungkum a ineih van pen tukum adingin, alui hita mawk hi. Nungkum a isan thupha pen tukum adingin kicing nawnlo hi. Pasian thupha isan theih nadingin, lungsim hoih, lungsim ngaihsutna man ineih ding kisam hi. Hazatna lungsim, muhdahna lungsim, gensiatnopna lungsimte pen thupha isan theihna dingin hongliah hongdal nate na hi thei hi. Tuabang ineih leh Jesuh’ min tawh ihepkhiat masak kul ding hi.

Tukum 2022 pen nang adingin, Pasian sungah nopsak kum, piakhiat kum, gualzawh kum, daupai kum, lawhcin kum, i mapai kum, hi ding hi ci-aa, ahoih lam vive in ngaihsun in, lungsim ngaihsutna man ineih leh i ngaihsutna bangbang hong paukhia dinga, kampauna i’gah, mit in mu a, khuttawh lawngtheih thupha, nang le na innkuan sungah hongtung ding hi. Hallelujah!

 

JESUH SUNGAH LUNGNOPNA LEH LUNGKIM NA (Johan. 14:27; Late. 37:4 )

Lungnopna leh lungkimna taktak icih in leitung nate tungah hilo in, Jesuh sung bek ah om hi. Kimlepam ah bangbang lungkhamna aw gingmah ta seleh Jesuh sungah iom nak leh, lungnuam ngiat ding hi.

Hongpiaksa zi, pasal, tanu, tapa, innlelo, motor te tungah ilungkim theih ding thupi hi. New Model nungah na delhdelh leh gimin, tawlin, leiba thangba na nei kha ding hi. I deih khempeuh ingah zawh lian loh hang, ikisap khempeuh hongsik Pasian hi.

Na neihsa le na ngah thupha tawh lungkim zaw in. Leitungah lungkim thei-te mi hampha pente na hi zaw hi.

 

ITNA KHAHKHIA NI. (1Kor. 13:4-7; 1Johan. 3:18)

Ei hong itte tungah it ding bek hilo a, ei hong itlote tungah zong, itna khahkhia-a, i it ding hi. Itna in na khempeuh tungah gual zo hi. Itna tawh kihua cihbang mi omlo hi. Agape Itna tawh ki-it ni. Itna khahkhia ciat ni.

Pasian in zong hong It lua ahih manin, a tapa khat bek aneih sun (Jesuh Khrish) mawhnei nanglekei ading hong piakhia hizaw hi.

Tua ahih manin, i ki-it nate kampi bek tawh hi lo-in, lungsim takpi tawh ki-it in I gamtatnat awh kilangsak ni.

 

NA UP BANGIN HONG PIANG DING HI. (Matt. 17:20; Matt. 21:21; 2Kor. 5:7; Heb. 11:6 )

Tukum pen kum dang tawh kibanglo, na khempeuhah nopsakna leh cidamna ngah kum hi ngiat ding, cih bangin na upleh na upna bangin hongpiang ding hi.

Upna nei i cih ciangin i muhtheih nai loh i lamette ngah takpi ding, ci-in muanna lungsim neihna ahi hi.

Nungkum zong hong zawhpih Topa in, tukum zong hong zawhpih lai ding hi ci-in, upna leh muangna tawh na nuntak leh, na up bangin hong zawhpih kan lai ding hi.

2022 kumthak thupha nangleh na innkuan sungah hongtung ta hen.

 

Lungdam.

Rev. Tuang Lian Khai@Khaibawi

Youth Pastor

Zomi Agape Church 

 

Post a comment

This site uses Akismet to reduce spam. Learn how your comment data is processed.

Print your tickets