fbpx

PASIAN KIANG PAN ka theih khak loh siamna (Talent) – Lia Khawm Boih

Ei Zomi Khristiante in na khem peuh ah thupi i sak mahmah pen Pasian hi. Pasian pen a minin a thei mahmah-te ihi hi. Biakinn pai le kikhopnate zong a thupi sak mahmahte ihi hi. Tuni-in tua “Pasian a min theih bek tawh omom ding maw, a mah lungkim sak nate sep ding khensat ding” cih pen nang teel ding ahi hi.
Zingsang na thawh pan kipan khensatna vive tawh kidim hi. Nai bangzah ka tho tam, cih na leng nang khensat theih ahi hi. Pasian in ei leitungmite a hong itna a kibang hi. Ahi zongin Pasian i lungkim sak zah khat le khat kibang lo hi. Nang ee, Pasian a lungkim sak pa/nu na hi nuam hiam? Gupkhiatna ngah khinsa mi khat na hih leh, na Khristian nuntak na pen a kipan hi pana, naungek bangin kha thu ah a suak tung na hi hi. Naungek panin nu’ nawitui bek a dawndawn ding Pasian in a gelna hi lo-in, nang le nang in an huan thei-in na kivak theih banah, midangte a ding an a huan sak thei zah donga khangto ding na hi hi, “Hehpih na thu leh Jesuh Khrish theih na ah khangto semsem” ding ahi hi. (2Peter 3:18).
Tua ahih leh, Pasian theih semsemna ah a khangto dingte Pasian nasemte le makaite bek maw? Hi lo hi, nang mahmah zong Pasian theih semsemna ah a khangto ding na hi hi. Tua le, ke’n bangmah siamna le hihtheihna tuamtuam lah nei lo hi veng, na ci kha hiam? Na neih gige a, na zat loh siamnate kikum khawm ni.
Khat vei vei ciang in ei Khristian background, i khankhiatna i et teh, biakinn sungah i muh deuhte ahi tumging a tum thei, lasa thei, thugen siamte kimu deuh hi. Tuate bek Pasian in siamna leh hihtheihna a pia i sa kha thei hi. Pasian in nang sungah siamna namkim le hihtheihna tuamtuam hong piak lam na thei kha hiam? Lai na sim thei a, thu kigente na teltheih nate siamna hi lo ahi hiam? Leitung ah laisim thei lo le a kigen thu a tello mi tampi om lai hi. Nang in hih na siamnate zangin nisim in Paisian kammal ahi Laisiangtho sim-in thu ngen denin, daitakin Pasian hong gen kik thu zong ngai kawm le cin, tua na siamnate a zangzang na hi hi.
Hai (cup) sung ah tui a dimin a om khat ki sung beh thei lo a, a hai a tui a bei ciang, ki sung behbeh thei hi. Na hai (cup) a hong kidip thuah ding na deih leh, a sung a tuite kiam sak/ zangh masa in. Na siamna, na hihtheih laisim theihna le Pasian tawh kiho theihna, na aw, na hun, le na thatangte zang masa in. Pasian kam mal lot ngah ding pen Sunday school naupangte aa ding bek sa kha kei in. Naupangte in lot ngah zo ahih leh, nang uham khat in amau lot ngah zah val na lot ngah zawk ding hilo a hi hiam? Nang in zong lot ngah sawm in. Kum tam manin Laisiangtho lot ngah loh ding cih thu Laisiangtho sung ah kigen lo hi.

Tua na ( basic) siamnate na zata, amah tawh na kizop den leh huhpa Khasiangtho huhna tawh nangmah in tua Jesuh na tel semsem ding hi. Tua hi leh, Pasian alungkim sak nate bang cih, na thei semsem dinga, na theih mah bangin zong na gamta pah ding hi. Tua ciangin, kuamah hong piaktheih loh lungnopna le lungmuanna na ngah ding hi.

Post a comment

This site uses Akismet to reduce spam. Learn how your comment data is processed.

Print your tickets