fbpx

Pasian tawh ka kimuhna – Nun Nuam

Ka tuahkhak thu bek hong gen nuam ing. A diakdiakin khangnote in kei tuak bang tuak khak thei ding na hih manun, no tel dingin hong hawmsawn nuam ing. Ka neu aa kipan Khristian innkuan sungah khangkhia ka hihmanin, Pasian thu leh Khristian ngeina zia pen thei kisa mahmah ing. Zong zui zo kisa ing. Tua manin a piangthak zong ka kisa kha hi. Ai zongin, ka lungsungah khamuanna kician om thei lo hi.

A beisa kum 18 sung bang, ka lungsim tawngah daihna le khamuanna om lopi-in biakinn ka pai lanlan den hi. Ka ngaihsutna ah gupkhiatna le thumanna pen ka sepna le ka gamtatna tungah a kinga ka sakha hi. Hih bang nuntakna sungah ka gim lua ta hi. Hi bangin ka nungta suak nuam kei hi. Ka nuntakna ah kikhelna kisam cih ka thei hi. Ka pa tawh biakin ka pai den hangin, tua daihna pen om thei mahmah lo hi. Bang hang hi mawk diam ci’n ka lungngai zel hi.

Zan bang ihmu thei lo liangin ka ngaihsun hun tampi om hi. Hih pen Pasian kiang pan hi lo hi, cih bel ka thei hi. Satan in ka ngaihsutna hong nawngkaii sak hi, ci’n ka ngaihsun hi. Hih bang lunghih mawhna pen Khristian khangno tampi sungah zong a om hi. Ai zongin, hih lunghih mawhna pen kua ma kiangah kigen nuam lo hi. Ka lungsungah daihna om thei mahmah kei ci-in mi kiangah i gen ding sangin, a thei lo dan khat in kineihin ki-om zaw pian hi. Ai zong, tua lunghi mawhna pen a tawng khat ah om den veve hi.

Ka neu lai thu tawm hong gen kik pak leng: ka pa pen zatui tuamtuam zangin inn ah zong om kei lo hi. Tua hun lai bangin Pa a cih nei keng ka ci phial hing. Malaysia ah ka om uh ciangin, ka nu in si kensa natna nei ahih manin hong kem zo lo-in tagah bangin tagah saangah ka om kha hi. Tua lai-in kum 8 kiim pha pan hi’ng. Pasian kiangah Topa, tunlezua pham lah hisam lo, tagah bangin ka om uh ci-in Pasian ka phun kha zel hi. Pasian tungah ka nu damna ding le ka pa kikhelna ding ka ngen vua, tu’n damin a kikhel uh hi. Ai zongin, Pasian’s lawnna ka ngahna lian om nai lo hi. Pasian in hong lawng leh bel ka khantawnin kimang ding hi, ka ci ngam hi. Ai zong, tukum Jan kha ciangciang, tua bang Pasian lawnna ka ngah ngei kei hi.

Ni khat, ka pate’n puan koihna inndei ah minit 5 khawng thu ka ngen hi. An zong tang lo hi’ng. Ka lunggulhna khauh pai lua hi ding hiam, tua ni Pasian’ lawnna i cih diam Pasian kiang pan a thaka daihna, khamuanna ka ngah hi. A beisa hunin, Rapture hong tung leh, bang ka ci tam, ci-in zan simin ka lungsim patau zel hi. Vantung gam ka tung tam ci-in ka ngiahsut ciangin, kei le kei ka kidawng thei kei hi. Ka lungsim gimin, sehnel gam bang ka nuntakna keu ka kisa hi.

Tua ni, Jan 11, 2021 in tua inndei sungah khukdin’ sukin, “Topa, ka nuntakna hong khel in, tu ni-in nang tawh ka kimu nuam hi”, ka ci hi. Tua laitakin ka omna inndei sung, Khasiangtho tawh hong kidim hi. Pasian in a kammal tawh hong hopih hi. “Itna nei lehang launa om lo a, itna cingtaak nei peuh lehang launa beimangta hi. Bang hang hiam cih leh launa i cih pen gimthuak ding kihtakna hi a, gimthuak ding a laute pen itna cingtaak a nei lote ahi hi.” (1 JOHAN MASA 4:18 TDB)

Ka lungsim sungah launa ka neih leh, itna nei lo cihna hi pah hi. Itna manin launa hawlkhia hi. Launa pen gimthuak ding kihtakna hi. Ka launa pen ka et ciangin bang hiam cihna tua gimthuak ding hi. Tua gimthuak ding pen Hell hi. Gimthuak ding a laute pen itna nei lo cihna hi ci hi. Tua lian ciang, Pasian gennop pen tha khat thu-in ka tel lian hi. Itna ka neih loh lam ka tel lian hi. Ka lungsim sungah siangtakin ka muh thu in itna man a thei lo ka hih lam ka kitel hi. Kum 18 sung bang, biakinn paiden napi-in tua itna man ka theih loh ci-in kei le kei ka kimawh sak hi.

Khasiangtho in tuma kum 2000 lai hong pai pihin, Topa, na itna leh na hehpihna lian mahmah zai mahmah cih ka theih sa hi mah le zong, tu-in kei adingin hong lian sak hong zai sakin kei hong bansak lai in, ci-in thu ka ngen hi. Khasiangtho in hong ho pihin, “Nuam aw, tuma kum 200 lai-in na suak nai hiam” hong ci hi. “Suak lo” ka ci hi. Tua leh, na mawhna hangin tuma kum 2000 lai-in ka nuntakna ka pia khin zo hi. Mawhna le na hoih na bawl theihma nalengin, na mawhna a mai khin hi. Tua manin mawhmaisakna pen na hoih na sepna hang hi peuhmah lo hi. Tha khat thu-in Khasiangtho in hong tel sak ziau hi.

Hih thu pen tamveipi ka zaak sa hi napi, Pasian tawh ka kimuh ciang, Aman ka lungsim hong hon sakin hong telsak hi. Tua manin kei bangin a tuakkha na om uh leh, hong hantawn nuam ing. Eite up Gupkhiatna pen i sepna tawh kisai peuhmah lo hi. Hell pai ding maw, Van pai ding cih tawh na lung himawh lai hiam? Nasep hoih semin gamtat hoih ka hih manin vangam pai dingin ki ummawh kha ken. Zehphitkha-in gamta khial pak khak manin Hell pai ding ka’i ve maw na ci kha hiam? Tua bangin a hi kawkawi dingin hong deih sak lo hi’ng. Kei bangin Pasian tawh na kimuh nai kei leh, ngen un. Lungsim takpi tawh na nget nak uh leh, Aman hong hopih ding hi. Amah tawh na kimuh nak leh, na nuntakna hong kikhel dinga na khantawng a kimang ding hi.

Hih khit ciangin kei zong a hoih lo bawl kha sem kha ngaihsun kha zel ing. Ai zong, khasiangtho in tua inndei sungah ka tuak- Pasian tawh ka kimuhna hong phawksakin ama kiangah ka ciah kik zel hi. Ka lung a kiat ciang ai zong, thu haksa khat peuh ka tuak ciang ai zong tua lai-a Amah tawh ka kimuhna ah ciah kik zelin tha ka la zel hi. Satan in ka gupkhiatna hong lunghiangsak, hong muangmawh sak ciangin, tua Pasian hopihna ka lungngai kik hi. No zong kei mah bangin Pasian tawh khat vei na kimuh ding uh ka thungetna hi. Tua in na khantawng hong khel ding hi. Tua manin Pasian tawh ki maituahna ding thungen un ci-in kong hantawn nuam hi.

(Sia Nangno’ tanu nihna Nuam in ZAC ah a tecipanna kitomlak kik ahi hi. A cingin a ngai nuamte in a ZAC facebook le Youtube-te ah ki-en kik thei hi.)

Post a comment

This site uses Akismet to reduce spam. Learn how your comment data is processed.

Print your tickets