fbpx

Thupha tawh a kidim Ni thakte – Samuel Soe Lwin

Mi khempeuh phial in a nuntakna uh thupha bek tawh a kituamcip ding lunggulh uh hi. A diakdiakin, Kawlgam mi khempeuh in thei ngei, mu ngei tek hihang.Tua hang mahin, “Hunhoih ni (Yet Yaza)” le “Kaamsiat ni (Piatada )” ci-in kalenda ah khen hi hang.
Bang hiam khat peuh pawl ding hileng, thu theite kiangah lengsong tawh pai-in cikni-in bawl ding cih i dong thei hi. Kei mahmah zong ka nuntakna sungah hunsia kaamsiat nite pelhin, hunpha ni vive hi leh ka ut hi.

1. Pasian bawl thuphate
“Hih ni pen Topa’ hong piak ni hi a, eite lungdamin i kipak ding hi.(Late 118:24 TDB)”
Laisiangtho en leng, ni khempeuh thupha tawh kidim hi. Tua nite tawh Pasian in amah le mihingte kinaitakin nuntak theihna ding hunhoih hunpha hong piakna pen “Bang hang hiam cih leh amah in mihoihte le misiate tungah a kibangin ni taangsak khawm a, a gamtat phate le a gamtat siate tungah zong a kibang mahin guah zusak khawm hi (MATTHAI 5:45 TDB)” ci-in mihingte adingin a kikim hunhoih hunphate hong hong pia hi.

Hi bang thuphate Pasian in hong piak hangin mi kim in i ngah theih lohna pen i kantel ding kisam hi.

2. Mite’ gen hunhoih hunpha
Laisiangtho sungah “Huhna a hong pia thei lo uliante ahi a, mi mawkmawkte ahi zongin muang kei un.”(Late 146:3 TDB) ci hi. Hih bang a genna pen ahang om hi. Mite’ gen hunhoih ni le hunsia ni cih pen bangbang i ci zong Pasian a paa kei leh, kaamsiat ni hi den ding hi. Laisiangtho ah “Topa in kong cihin-ah: “Mi bek muangin mi’ hatna bek suang a, Topa tawh a lungsim a kilehngat mi in hamsiatna a ngah ahi hi. Amah pen sehnel gamah a po sawlbawk bang hi a, khangin a bawk a phazo kei ding hi. Kuama ten lohna ci gam, keugaw gamah amah a teng ding hi. (JEREMIAH 17:5-6 TDB)” ci hi. Tua manin mite in a mau upmawh tawh hunhoih ni a cihcih uh hangin, nisim Pasian a nungngat sanna hangin nuntak haksakna sungah a tum lam kithei lo-in tum suksuk uh hi.

3. Pasian’ zia tawh kituak thupha
Kawlkam ah mi pen nam nihin khen hi. Tuate in “ Andah Puhthuhzin (Mittaw)” laingnih kikal ah lu a po hangin ganhing a bang lelte, le “Kalia nah Puhthuhzin(Mitvak, pil)” ci-in Pasian hangin nuntakna maan ii hoihnate, nopnate a thei le a ngah mihing taktak cih a gennuam hi.
Pasian kammal sungah mi khempeuh Pasian in a kibang hunhoih hunpha hong piatek hi. “ Hih bangin a hihna pen mite in amah zongin a muhtheih nading uh a deihna ahi hi. Ahi zongin eite kiang panin Pasian gamla om het lo hi. (SAWLTAK 17:27 TDB)” ci hi.
“Hih ni pen Topa’ hong piak ni hi a, eite lungdamin i kipak ding hi. (Late 118:24 TDB)” a cih ciangin, Pasian sung a omte adingin i neilai-a cassette sunga kikhum pau bek kizang thangthu sunga “Kei bang pasal tuahsia cih bang om lo (Nga Lu Yaokcia Piatada Masih)”, a cih bangin i khualzinna lampi ah hunhoih hunpha bek i nawt kha ding hi.

4. Pasiante, thupha ngahte
Tuni-in tapa Jesuh a um khempeuh adingin Pasian’tate suah theihna Pasian in a um khempeuh a pia hi (John 3:16). Tuhun Kawlmite’ kam ah “TapPuRyiTah nam” ci kammal pen citpiak khiatna munte ah kiza den hi. Mi kim Pasian’ tate suah theihna ding naak hanciam mahmah uh hi. Ahi zongin amau hanciamna tawh hilo-in, Pasian hong piak a tapa Jesuh hang bekin Pasian’ tate a kisuah theih lam, mi kim in thei lo hi.
“Mi khat in, ‘Pasian hangin eite piangin, hingin i gamtang hi,’ ci-in gen a, note sung panin laphuah siampa khat in zong, ‘Eite zong ama tate ihi hi,’ na na ci hi. (SAWLTAK 17:28 TDB)”
Pasian tawh kisai mite adingin, “Ama nopsakna pen Topa thu sung bek mah hi a, sun le zanin ama thu a ngaihsunsun mi ahi hi. Amah pen lui tuiluang gei-a a kisuan ama gah hunin gah a, a teh a vul ngei lo singkung tawh kibang hi. Ama hihna khempeuhah a maa pai mahmah hi (Late 1:2-3 TDB)” cih thuphate kimu thei hi.

5. Pasian’ gelna
Kum thak pen thupha bek tawh i lut nuam hi. Tua ding lung kham ke’n. Pasian in kum thak hong kan sak pen a kum beka khang dinga hong kan sak hilo-in, tua kumthak tawh “thuphate” a cih ama gelnate tawh hong tuamcip ding hi.
Isaiah 55:8-10 ah a cih mah bangin, keite adingin “hong cing hong kepna, hong huh hong panpihna” thuphate zong kigingsa-in a om hi. “Hih teng bang ahih khit ciangin bang gen ding om nawn ahi hiam? Pasian in eite hong koppih peuh leh kua in eite hong zozo ding ahi hiam? Ama Tapa nangawn siit loin eite khempeuh a dingin hong piakhia ahih manin, na dang khempeuh zong hong piazaw kan ding hi lo ahi hiam? (ROM 8:31-32 TDB)”
Tua manin tu kumbup pen a kicing hehpihna tawh hong kha ding Pasian in hong pailai ding nite zong ama kamciamte tawh “hong hu, hong dal, lam hong lak, hong panpih, hong huh” den ding ahih manin, kumthak ah tua Topa tawh kalsuan khawm ni. “Hih pen eima Pasian hi a, a tawntungin eima Pasian hi, ……… Amah pen a tawntungin lam hong lak ding pa ahi hi. (Late 48:12-14 TDB)”

Post a comment

This site uses Akismet to reduce spam. Learn how your comment data is processed.

Print your tickets