fbpx

Zomi Agape Pawlpi sung ah nop kasak na

Zomi Agape Pawlpi sungah Pasian na kasep pen May 2015 pan a hihi. Kum 5 sung, Pawlpi inn, 91 ka pha uh hi. America gam sung ah a om, Kawlgam Pawlpi te lak ah Pawlpi khangto pen Top ten lak-ah  a kihel Pawlpi khat a hihi. Constitution hoih takin anei Pawlpi hi a, Lai Siangtho tawh a kituak Doctrine hoih tak a aneih Pawlpi zong a hihi. Ahunhun  in Pawlpi kalsuan zia ding Kha 3 sial in Pawlpi EC meeting kinei den a, Pawlpi mi khempeuh a ding a lem theipen dingin, thu leh la ki vaihawmden hi.

A ki innteksak lua, a ki Sia saklua omlo a hih man in mikhempeuh suakta in nuam kisa mahmah hi. Sia te hun ( time ) man mahmah uh a hih man in Pawlpi mi khempeuh zong hunman mahmahpah uh hi. Kipatding nai acin nakleh ki ngakngak cih om peuhmahlo hi. Zomi Agape Pawlpi pen hunman mahmah a hih man in Pawlpimi khempeuh zong kikhop ding lawp mahmah uhhi. SA NI thunget naleng  Nupi Papi 50 kiim kipha den hi.

Dahna nopna ah Pawlpimi te khat le khat nasia takin ki uap in kipai tanghtangh a hih man in Pawlpi sungah ki it na khangsak mahmah hi. Pawlpimi te in Sia te tungah it na nasia tak in lak uh a hihman in Sia te in Pawlpi mi te tungah lungdam na lianpi tawh nasem uhhi.

Zomi Agape Pawlpi pen Pawlpi omsakhat, ( Tuiphum Pawlpi, AG Pawlpi, EBC Pawlpi ) cih te, bulphuh in a ki-lam Pawlpi hilo a hih manin Zomi Agape Pawlpi ah mikhat innkuan khat honglut ding uh hamsa sa nawnlo uh hi. Tua man in a kha kha, a kum kum in Pawlpi mi, ki behlap ziahziah a, Pasian in hongkem hongkhoi in thupha hongpia in nuam kisa mahmah kimciat hi.

Hih pawlpi ah ka-om man in ka taksa ka kha a lungmuang mahmah a, ka damlo ni te naleng ah kalung a nuam mahmah hi. Topa hongkoihna mun a hih na katel semsem a, Topa tung leh Zomi Agape Pawlpi mi khempeuh tung ah kalung a dam mahmah hi.

Rev. Dr. Thang Za Kap

Post a comment

This site uses Akismet to reduce spam. Learn how your comment data is processed.

Print your tickets