fbpx

Thulu (title) :                     “Thawhkik Vangliatna”

LaiSiangtho Mun :            Korin 15:3-4 ~ Kei tungah a hong kihilh a thupi pen note tungah ka hong gensawn a, tua in: Lai Siangtho sungah a kigelh mah bangin eite’ mawhna tang dingin Khrih hong si-in kivui a, Lai Siangtho sungah a kigelh mah bangin a ni thum ni-in Pasian in hingkiksak hi. (TDB)

Topa Jesuh hong thawh kik teh bang Vangliatna, bang Thupi piang a hihiam?

SUNDAY NI VANGLIATNA

  1. Topa Jesuh Sunday ni in hong thokik hi.
  2. Nungzuite in thawhkikni ahi Sunday ni in kikhop biakpiakna bawl kipat pen, tuni dong ki zang suak. ~ Topa Jesuh thawhkik ni a biakpiak na kibawl. ~ 1 Korin 16:1-2 ~ Tu-in Judea gam a om Pasian mite huh nading sum kaihkhop nading thu tawh kisai-in: Galatia gam a pawlpite in a hih ding zia uh ka gen bangin note in zong na hih un. Kei ka hong pai ciangin sumpi kaihkhop tawm a om loh nadingin na ngahna uh tawh kizui-in Nipi simin na tuamkoih unla, na na khol un. (TDB)
  3. Topa Jesuh sihna zo in hong thawhkhit ni 50 khitteh Vantungpan KhaSiangtho huihpi nungbang innah leitungah hong ki buasuk, Tua ni pen Sunday ni mah hi in, pawlpi tampi tak hong piangpah in, mihing 3000 bang piangthak pah hi. Tua tungtawn in Sunday ni in Pasian vangliatna nasia tak a hong tung cih ki thei hi.
  4. Sunday ni biakpiakna anei/azang mite in, ani dangdang a anei te saang, KhaSiangtho sathau nilh na ngah phadiak hi.
    • I muhtheih ding, Leitungah Sunday ni biakpiakna a zang tampi te sungpan innah aminthang pha deuh pawl khat :
      • Martin Luther – hong pianthak khitciang ama upna a hi Catholic pen man sa nawn lo ahih manin ~ Catholic te Upna leh LaiSiangtho a kituak lohna Nam 95 (Theses 95)~ cih thulu tawh laibu khat hong gelh khia hi.
      • John Wycliffe – te unau in Hehpihna haang bek tawh gupkhiatna/tawngtung nuntakna kingah theih cih in leitungbup ah hong tangko khia hi.
      • TL Osborn
      • Kenneth Copeland
      • Billy Graham
      • Joseph Prince
      • Younggi Cho
      • Rev. Dr. Hau Gin Kham
      • Rev. Kam Hau
      • Rev. Dam Suan Mung
      • Rev. Do Sian Mung
    • Sabbath tang te a pilna uh sangtheih mahmah ahih haang, Pasian nasem ci a leitungbup cih loh, ei kawlgam sung bek azong a minthang om lo ~ Bang hang hiam cih leh, Pasian sathau nilhna ngah lo.
    • Dem zawh loh ding lasa siam, pilna nei, hauhna nei Sabbath mitam pi tak om mah taleh, Pasian sathaunilh angah om lo ahih manin, amaute sungah khantohna cih omlo, kimu lo.

SABBATH TAWH KISAI

Sabbath tangte bulphuh LaiSiangtho : Piancil 2:1-3 ~ Tua ahih ciangin vantung, leitung, le a sunga omte khempeuh kiman khin hi. Ni sagih ma-in Pasian in a nasepte zo khinta a, ama hihsa nasep khempeuh panin ni sagih ni-in a tawlnga hi. Tua ahih ciangin Pasian in ni sagih ni thupha pia-in siangthosak hi. Bang hang hiam cih leh piansak nasepna ama nasep khempeuh panin tua ni-in Pasian a tawlnga hi.

  • Pasian in a nasepte zo khin ahih man in tawlnga hi. (LaiSiantho sungah, “Kei zong tawlnga ka hihman in, no zong tawlnga un.” cih thupiak na om lo)
  • Noah te khangsung ah zong Sabbath ni kitang cih thu om lo.
  • Adam khang ah zong Sabbath ni a tang cih mi om lo.
  • Abraham khang ahi kum tul kiim sungah zong Sabbath ni tang omlo.

Sabbath tan bang hunteh hong kipan hiam?

  • Moses hun in, Sinai mualtungpan , Thukham 10 hong kipiakna sungpan hong kipan ahihi.
    • Bang hang ki tang?  Thuhilhkikna 5:15 ~ Egypt-ah nasem na hihna uh le tua lai panin Topa na Pasian un a vangliatna khut le a thahatna tawh hong paikhiatpihna na phawk ding uh hi. Tua ahih ciangin Sabbath ni na tan’ ding uh Topa note’ Pasian in thu hong pia hi.
    • Adam, Noah,Abraham cih te in banghang Sabbath tang lo hiam cih leh, amau Egypt ah sal a tangkha lo.
    • Moses khang hun ciang Pasian in, Vangliatna tawh hong sal tanna pan in hong hotkhiatna na phawk na un, Sabbath na tang un cih hong vaikhak.
  • Topa Jesuh in, singlamteh tungah hong sih khitteh Sabbath tan luang innah, Moses hun lai innah sal pan kong hotkhiatna na phawkna ding un Sabbath tang un; tua mah bang in no zong Satan sila inn a na om na pan Jesuh in hong honkhia ahih manin na phawkna ding un nekkhop na bawl un hong ci hi. ~ Nekkhop (communion) Satan sila i hih laitak in , Topa Jesuh in hong hotkhiatna i phawk na ding a i nek ahihi.
  • Sabbath tan kulnawn lo :
    • Kahla 2:6 ~ Amah in biakna Biakinnpi
      a zan gawpsak hi. Amah in biakna ni siangtho nite le Sabbath nite a beisak hi. Kumpite le siampite in a nasia ama hehna a thuakkhawm uh hi.
    • Kolose 2:16 ~ Tua ahih manin annek tuidawn, biakna pawite, Khadet pawi, le Sabbath ni tawh kisai-in kuamah in ngeina zuih ding bawl kei un.
  • Sabbath tang kei leng gupna ngah lo ding cih a lunghihmawh te :
    • Galati 4:10-11 ~ Note in nite, khate, hunte, kumte a kipan pawi tuamtuamte limtakin tan ding na hah ngaihsut mahmah uh hi. Tua ahih manin note a dingin ka nasepna khempeuh a mawkna a suahkhak ding ka hong lunghihmawhsak mahmah hi. ~Paul in Sabbath tang lai mite ading in lunghihmawh ~
    • Paul in Sabbath tang maw tanglo?
      • 1 Korin 9:19-21 ~ Kei pen kuama khutnuai mi hi loin a suakta mi hinapi-in, mi a tam theithei ka ngahzawh nadingin mi khempeuh’ khutnuai mi-in ka kibawl hi. Jew mite lakah na ka sep ciangin amaute ka ngahzawh nadingin Jew mite khat mah bangin ka gamta a, Moses Thukham ka zuih ding a kisap loh hangin a zuite ka ngahzawh nadingin amaute lakah na ka sep ciangin amaute mah bangin ka gamta hi. Tua mah bangin Jew mite’ Thukham in a huam loh Gentail mite lakah na ka sep ciangin amaute ka ngahzawh nadingin Gentail mite bangmahin ka gamta hi. Hih bangin ka gen ciangin Pasian’ thukham a zui lo, cihna hi loin Khrih’ thukham zui-in a gamta ka hi hi.
      • Paul in Sabbath tang lo; tangin cih zong gen lo.
      • Rom 10:4 ~ Khazih in thukham bei sak hi.
    • Topa Jesuh in zong Sabbath tang lo :
      • Matthai 12:1-14
        • Matthai 12:5 ~ Tua ahih kei leh zong siampite in Sabbath sim mahin biakinn sungah Sabbath thukham khial napi-in mawhsakna a ngah tuan lohna thu uh, Moses Thukham sungah sim ngei lo na hi uh hiam?
        • Matthai 12:9-14 ~ Topa Jesuh in Sabbath ni in, khutlangkhat a zaw mipa dam na a piakna tungtawh in Farisai mite in Jesuh Sabbath ni tang lo in, midam sak hi ci in athah theih na ding lampi zong.
        • LaiSiangtho sungah Topa Jesuh in Sabbath na tangun cih kammal om lo; anungzui te in zong acihna om lo.
    • Paul in Sabbath ni athupi sak mahmah te tungah a gen :
      • Rom 14:5-6 ~ Mi pawlkhatte in ni khatpeuh adang sangin thupi zaw hi, ci-in ngaihsun uh a, pawlkhatte in ni khempeuh kibangkim hi, ci-in ngaihsun uh hi. Tua ahih manin a kuamah peuh in amau’ hoihsakna thu ciantakin thei ta uh hen. Ni khatpeuh thupi diak hi, ci-in a tang mite in Topa a pahtawina-in a tang ahi uh hi. An khempeuh a ne mi in zong Pasian’ tungah lungdamna ko-in ne uh ahih manin Topa a pahtawina mahin a ne uh ahi hi. Nek dingin kilawm lo hi, ci-in a ne lo mite in zong Pasian tungah lungdamna mah ko ahih manin Topa a pahtawina mahin a ne lo uh ahi hi.
      • Mi pawlkhat in, Sunday ni saang in Sabbath ni thupi sak zaw uh hi; Mi pawlkhat in ni khempeuh a kibang in ngaihsun uh hi; Pasian in a kibang in saang hi.
      • “Ni abia te in ni thupi sak aa, Jesuh abia te in Jesuh a thupi sak hi” – Rev. Dr. Nae Thang
        • Sunday tang mite in Jesuh thupi sak.
        • Sabbath tang te in Ni thupi sak.

~ Puan-ak (button) khat kilh khial leng adang teng a lem theih nawn lo bang mah in, LaiSiangtho zong lakhial/ telkhial/ sangkhial leng avek pi in lem thei nawn lo hi.

TEL DING/THEIH DING BULPI:

Thawhkikna Vangliatna in bang teng hong hamphat lawh sak hiam?

  1. Sunday ni Topa Jesuh hong tho.
  2. Sunday ni in, nungzui te in biakpiak na hong kipat pen tu dong ki zom suak.
  3. Sunday ni in KhaSiangtho hong ki bua suk.
  4. Sunday ni biakpiakna azang (95/100) te sung pan bek a Pasian sathau nilh mi hong piang. Pasian nasem tampi hong piang in, khamangthang tampi kiman.

– Rev. Dr. Thang Za Kap (ZAC Mission Pastor)


0 Comments

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.