fbpx

Kipatna LaiSiangtho mun :

Late 55:22 – TOPA tungah na vangik nga in, amah in hong huh ding hi. Amah in mi thumante kilingsak ngei lo ding hi.

Topa tungah vangik (I kiim le paam pan dipkuat na tuamtuam, Coronavirus haang la lungkham na, Nasem te company te kikhak, sum lut kicing lo) teng ap ding. Zing leh thai ah bang piang ding cih i theih loh haang innah, Topa kammah tungah ki nga ding.                                                                                   

—-THUNGET KHOPNA —-

Topa tawh kizom den ding; thungen den ding. Topa’n I thungetna te hong mawksuak sak loding. Pasian in ama gelna hun nei hi. A hun hong cin ciangin, bang mah hun aa I muhngei nai loh, I theihngei lo alamdang tak a hong ompih/ tonpih ding hi. 

Hanthotna LaiSiangtho Mun : Luka 19:28-44 

Bang hang in Topa Zeisu Jerusalem khuapi ah hong lut kul a hi hiam?

  • Piancil pan kipan Topa kiangpan hopih na te a hun hun in mihing te tungah hong ki langh. A hi zong in, Malakhi pan LaiSiangtho lui leh a thak kikaal kum 400 hong sawt sung Topa kiangpan bangmah hopih na om nawn lo. Topa mahamh hong ki latna om nawn lo ahih man innah, Topa mahmah pen Jersalem ah lut in Calvary mualtungah, nang leh kei a ding biakpiak na alui ma teng, Pasian leh mi pen kigawm khawm thei lo; kikhen hun ahihi. Tua ahih manin Ih Topa Jesuh pen Jerusalem khuasungah hong lut kul a hihi.

Ih LaiSiangtho bulphuh ahi Luka 19:28-44 pen thu -6- a khen in kikum khawm ni. 

1. “Aki niamkhiat I Topa Zeisu” 

  • Luka 19:28 “Jesuh in hih thuteng a genkhit ciangin amah masa-in Jerusalem khua manawhin a paisuak hi.” ~Mi nam 2 te kilem na ding in, ama pumpi tawh biakpiak na lui dingin a pai Topa Jesuh ahihi. Pasian in Moses tungtawn in Israel mite a vaikhak ahi.~
  • Paikhiatna 23:14 “Kum khatin thumvei, keima a dingin pawi na bawl ding uh hi.” ~Kum khat innah thum vei peuhmah Pasian kiangah piakbiakna pia ding a pailo om lo ding cih thu piak na a hihi. Hih hun sungpen, Paisan Pawi kham ding hun tawh hong kituak a hih manin, Judah mi khempeuh Jerusalem khua biakinn pi ah Pasian tungah biakpiak na lui ding a pai ziahziah laitak uh a hihi. Tua biakpiak na lui na ding in, Judah mi te in, ganhing nam tuamtuam hong pai pih uh hi. Ih Topa Jesuh mahmah zong, hih Paisan Pawi zang ding innah Jerusalem khua manawh in hong pai aa, amah tungpan bangmah muh ding hong ken om lo hi tama leh, ama ken khat ominnah tua in ei letung mite leh Pasian kikal ah kilem/kigawm kik theih na ding in ama pumpi tawh biakpiakna lui ding in hong zuan ahihi; Kilemna Kumpi.~
  • Efesa 2: 13. “Ahi zongin a gamlapi-ah a om ngei hinapi-in tu-in Khrih Jesuh tawh na kipawlna hangun ama sihna in Pasian kiang hong tunpih hi.” 14. “Khrih mahmah in Gentail mite le Jew mite pawlkhatin hong bawl ahih manin eite tungah nopsakna a hong piapa ahi hi. Hih minam nihte khenin gal a piangsak dalna pen Khrih in ama pumpi tawh a satkham hi.”~ Gentail mi a hi nang leh kei pen Pasian aneilo te hi tase mah leh hang, Judah mite leh Pasian hong kilem loh ciangin, hih kilem lohna teng khempeuh a bei na ding innah a tapa Jesuh mihing te leh Pasian kika a kilem kik theih na ding in a hong pia hihi. Tua ahih manin Jesuh Jerulasem ah hong pai a hihi.~ 15. “Amah tawh kipawlna hangin minam nihte pawlkhat a suahtheih nadingin minam a dei Jew Thukham le a ngeinate khempeuh phiatin, eite pawlkhat hong suahin a hong kilemsak hi.” ~Zeisu sihna innah, eite Pasian mi asuak I hihi.~ 16. Singlamteh tungah a sihna tawh Khrih in kilangneihna beisak a, tua singlamteh hangin minam nihte pawlkhat suahin Pasian kiang a tunpih hi. ~Pasian kiang I tuntheihna ding in Topa Jesuh Jerulasem khua ah biakpiak na lui ding in, a hong pai ahihi. Lano tung hong tuanna in, ama hihna te nusia a kiniamkhiatna hong lah na ahihi.~
  • Innkuan sung ahih kei leh community sung pawlpi sung cih te ah “KEI” lungsim nei a, ki hihsaktheih na I neih leh galsung a om tawh ki bang ding a, nopsak na om lo ding hi.
  • Ki hihsak theihna I neih leh I gualleh kipat na ahih lam thei tel ciat ni.
  • Ki niamkhiat takin, I Topa Jesuh khekhap zui in Khazih gam a ding anungta ding in Topa in mimal kim thupha hong pia ta hen.

2. Luka 19:30 “amaute kiangah, “Mai-a om khua-ah va pai un. A khuasung na lut uh ciangin kuamah a tuan’ ngei nailohna lano khat khau a kikhih na mu ding uh hi. A khau sut un la, hih lai-ah hong kai un.” ~ I Topa Jesuh Jerusalem ah hong tun theihna ding a Lano tungah tuang hi. Lano ci pen ganhing tuam tuam sungpan a ahatlo pen hita maleh, Pasian in Lano hong telna in :

    • Khangno tampi takte tungah Topa’n talent hong piak tampi tak om hi. Na khangno thahat lai, na hihzawh laitak in Pasian a ding a kipia khia in. 
    • Nang bang hatna nei, bang hih thei? Pasian ading kipia khia in, sum lo ding hi teh! Nang haang in Pasian minthang sak in.
    • Mi te in nang tungtawn in Pasian abiaktaak, aphattaak, apahtawi taak hunlam ki mu sak in.
    • Mite muhna ah aniam pen mun ah na hiphial zong, citak tak a nasepna munah kuamah in hong pahtawi loh hang, Topa’n hong mangilh lo ding hi.

    3. “Topa in deih hi” Luka 19: 33. “A la khau a sut laitakun la neite in, “Bang hangin sut na hi uh hiam?” ci-in a dot ciangin, 34. Topa in deih hi,” ci-in a dawng uh hi.”

      • Nungzuite in, “Topa in deih hi.” cih a pulak mah bang in, Nuntakna sungah Topa’n hong piak talent te, Topa in a deihlam mangilh kei ni. Nisim nuntakna a ding tawh buai den hilo in, Khazih gam a ding zong buai ni.
      • Topa a dingin nang bangtawh mapang ding na hi hiam? Pilna, siamna, neihsatawh, thungetna tawh Pasian a ding kalsuan khawm ni.

      4. “Topa a dingin thumang in.” Luka 19: 29 “Oliv Mual tunga a om Bethfage leh Bethany khuanai a tun’ ciangin a nungzuite nih masawlin 30. amaute kiangah, “Mai-a om khua-ah va pai un. A khuasung na lut uh ciangin kuamah a tuan’ ngei nailohna lano khat khau a kikhih na mu ding uh hi. A khau sut un la, hih lai-ah hong kai un. 32. Amaute gel zong paipah uh a, Jesuh’ gen bang teekteek mahin a na om hi.” ~Hih nui te nih nuntakna ngaihsun le hang, tulai tak in mukhat peuhpeuh I painop ciang innah, address kigen a hi kei zong GPS tawh, tua lo a phone ki ho a na om hiam cih ki dong masa. Hih nungzui numei tegel hileh, Zeisu’n sawl a hihmanin, om maw om lo cih hinawn lo-in, sawlna mang a khuasungah apai ahihi.~

        • Nungzui te nuntakna et-teh in, Topa’n hong sawlna ahih naakleh pai pah in. A nasem ding in gelna nei a, hong sawl ahi leh pai pah in, zekai kha ken. Mi khat peuhpeuh huh in acih leh neih leh neihloh hilo in huh in. Thungetsak in acih leh pai in nget sak pah in. 
        • Pasian in hong sapna thei/telna hih leh, kicing na kisa kei zong in sem/zui pah in. Na nial aleh, na nuntakna in thuakin hamphatna ngah lo ding hi teh. Tua ahihman in, Pasian in hong sawl a hihnaak leh a sem pah ding in ki zawn hi hang.
        • Matthai 28:19 “Tua ahih ciangin note pai un la, midang khempeuh, keima nungzui mi suaksakin, Pa min, Tapa min, leh Kha Siangtho min tawh tui sungah na phum un.”; Marka 16:15 “Tua khit ciangin amaute tungah, “Leitung khempeuhah note pai kawikawi un la, mi khempeuh tungah Lungdamna Thu na hilh ta un.” ~ Hih kammal/ sawlna te pen a nungzui te a ding bek hi lo in, Zeisu Khrih umin, a sang mite khempeuh tungah ahng sawl a hihi. 

        5. Luka 19: 35 “Amaute in Jesuh kiangah a la paipih uh a, a lano tungah a puan uh phahin Jesuh a tuangsak uh hi. 36. La tungah tuangin Jesuh a pai laitakin a lampi tungah mite in a puante uh na phah uh hi. 37. Jerusalem khua a tun’kuan, Oliv Mual-a lam suktuah a kipatna panin Jesuh’ nung a zui mihonpite khempeuh in amau muhsa na lamdang liante hangin, nakpi takin a gingin Pasian’ tungah lungdamna ko-in amah phatding kipan uh a, 38. Pasian in Topa’ tangin a hong pai kumpipa, thupha pia ta hen. Vantungah nopna om hen la, Pasian’ min thang ta hen,” ci-in a awng uh hi.” ~ Zekhariah 9:9 “Zion mite aw, nakpi takin lungdam un. Jerusalem mite aw, lungdamin awng un. En un, na kumpipa uh hong pai hi. Amah, gualzawhna tawh hong pai hi. Ahi zongin kiniamkhiatna tawh hong pai a,sin nailoh lano tungah hong tuang hi.”

          • Mite lungsim ah bang a om laitak hiam cihleh, Zawmah kumpi pa kiangpan amau a suakta sak ding, ahong honkhia ding pa, amakai dingpa angak laitak uh ahihi. Bang hang hiam cih leh, tua hun laitak in gamsungah ki deidan na tuamtuam a tam lua ahih manin amau te asuakta nuam uh hi. Amau te in “Hosanna, Hosanna” cih a ot-na in, amau sungah ci leh sa lunggulhna, suahtak nop na hi.
          • Nidang aa Judah mite ot na/ phatna in, tuni in ei a ding ahih leh Pasian leh leitung mite gamla tak a i om lai, i kigal lai tak a Pasian ta hong suaksak hi. Tawntung sihna pan in, tawntung nuntakna a hong pia Pasian lungdam in i phatna/pahtawi na ahihi. 
          • Tuni in eite tawntung nuntakna a hong pia Topa bangtawh pahtawi ding i hi hiam? 
          • Na lungtang tawh Topa tungah lungdam ko, pahtawi ding.
          • Pilna, siamna, hih theih na tawh, pahtawi ding.

          6. Luka 19: 39. “Tua ciangin mihon lak panin Farisi mi pawlkhat in Jesuh kiangah, “Sia aw, hih bangin a awng na nung hong zuite kham in,” a cih ciangin 40. Jesuh in, “Ke’n kong cihin-ah, hih mite in hong phatloin khawl ta le uh zong, hih lamdunga suangte in phatin awng veve ding uh hi,” ci-in a dawng hi.” ~ Mipi te in Jesuh apahtawi ciangin Farisi mite hehin, Jesuh kiangah “hihna nung hong zui na mite a otna uh khawl sak in!” ci-in vagen a, ahi zongin Topa Jesuh in, “hih mite in kei hong pahtawina khawl leh zong, hih lamdung a suang te in kiko in kei hong pah tawi veve ding hi” ci hi. 

            • Nang Topa na phat kei phial zong, sing leh suang te in phat ding hi acih hih LaiSiangtho a hihi. 
            • Pasian in kam hong piak pen an nek na ding bek hi lo aa, amah i phatna ding zong a hihi. Khutle beng in khe te tawh Pasian phat in, Topa’n cidam na hong piak lungdam ko in.
            • Pasian in ei mihing te hong piansak na in, amah aphatding, pahtawi ding ahihi.
            • Husan laiteng Topa phat ni!

            Luka 19: 41Jerusalem khua hong nai semsem a, a khuapi a muh ciangin Jesuh in tamlawh a, 42. “Nopsak tawntung theihna ding bang kisam hiam, ci-in tuni-in thei lecin ut mahmah ing. Ahi zongin nang na theithei kei hi. 43. Na kimkotah na galte in a pan’mun ding uh hong to-in, hong umcihin hong nehcih hun hong tung ding hi. 44. Nang leh na kulh sunga om mi khempeuh hong sumai ding uh a, a omna ngei munah suang khat zong om nawnlo ding hi. Hih bang a pian’na pen nang a hu dingin Pasian hong pailam na phawklohna hang ahi hi,” a ci hi. 

            • Nuntakna sungah ih nopsak tawntung theihna ding, Jesuh ki sam hi.

            DEIHNA BULPI (Main Idea) :

            1. I Topa Jesuh Khrih a kiniamkhat mah bangin, eite zong kiniamkhiatna tawh Jesuh mel kilangh sak ni.
            2. Lano bang in kuamah in hong phawk kei zongin, i sep dingte matun dong sem ni.
            3. Kuamah in hongphawk kei zong, hong pahtawi kei zong, Pasian a ding a ihih theihna bangbang tawh mapangin, Khazih gam a ding in kalsuan ni.
            4. La neite bang innah neihsa ahih kei leh ei mahmah in Pasian ading i hihtheih na bangbang tawh mapang khawm ni.
            5. Sawltak nihte bang mah innah, Satan kol ah, aki khih lai leitung mite suut innah Jesuh khephung atun pih thu um mite a hizong in; bangbang hong piang taleh nuntak lai teng Pasian a ding nasem ding, pahtawi ding, ama minthang sak ding hi hang.

            – Rev. Gin Sawm Thang (ZAC Church Pastor)

            Categories: Hunzatna

            0 Comments

            Leave a Reply

            Your email address will not be published. Required fields are marked *

            This site uses Akismet to reduce spam. Learn how your comment data is processed.