fbpx

Ka Kikhelna – PA THOMAS NGING 

Kum [6] sung lawki sung ah om kum [25] sung bang RC pawlpi  sung ah ka om a, PASIAN ka um hi. Jesuh zong hong gumpa h,i cih um-in ka kikhawm zel sam hi.Lungdam bawl kuan bangah singluang kaih lawp mahmahin ka hanciam mahmah hi. Siate’ gen le makaite’ gen tungtawn bekmah pan ki-um hi a, Laisiangtho simin kancian cih bang om lo hi. PASIAN’ hehpihna hangin Jesuh in koici hong gum a, ka mawhna pan bangci hong tankhia-in sihna hell sung tumna ding pan  bang ci hong suakta sak , bang ci up cihte ka thei hetkei hi. Zong, hong ki ngen cian ngei lo hi. Tua dan upna tawh kibang a lungmuan huai lo upna [ mittaw sial khau let ], mai-a-te cih bangbang a ci tu hunin zong mi tampi tak om dingin ka ummawh hi. Tua hunin zu dawn, le lawm le gual tawh kithuah pen ka thupit sak mahmah hun ahi hi. Luke 15; 11-24 sung a Tapa taimangpa a ma ut bangin gamta nuam tawh ka ki bang hi.

 

1988 kim pawlin tangvalno ka hi ta a, piangthak nungakte ngai pian le zaktaa-in pau pih ngam loh hun, a kihem-et ngiaungiau bek hun ahi hi. Tua hunin  ka khua uh LAIBUNG ah [Gospel] Gupkhiatna thu gen piangthak cihte pawlte hong pai zelin, kei zong Gupnathu tel  nuam kawm, ngaknute mu nuam kawm,  ka va ngai zel hi. Tua hunin ka ngimna a hih leh, van tung dong pek hi masa lo hi. ‘Piangthak nungakte bang ci ngah ding, cih ngimna hi bek hi.Them khat bel tel zawdeuh samin ahih hang, kilamdanna ka nei tuankei hi. Piangthak ka kineih kankan hang, sau veipi kikhom zo lo-in a ngei ka bang  zela, zu sai mah ka tung kikzel  hi. Ahi hangin, khaici hong kivawhvawh na hi gige hi, cih ka nungphawk san a, manpha ka sa mahmah hi. Tu bangin ka kisuang sim gige hi. Hi bang hun danin leitungna khat peuh lunggulh man, mite’ pahtak ding utman, min le za deihman a kineihkhem zong ki-om thei gige ahi hi. Jeremiah 20;12 ah a thuman mite a en tel, lungsim le ngaihsutna a mu vang lian Topa ci hi.

 

2006 September kha,  nipi kal khat sung Sia P. L. Tuang tung pan’ Gupkhiatna thusinna ah lunggulhna tak tawh ka ngai a, nitak [5] khit ciang ka tel sinsen hi. (Note’ upna hangin Pasian’ hong hehpihna tawh hotkhiatna a ngah na hi uh hi. Note’ thalawhna hangin a ngah hi loin Pasian’ hong piakkhong ahi hi. Note’ hanciamna tawh a ngah hi lo na hih manun na kisialh nading uh a thu om lo hi.EFESA 2:8‭-‬9 TDB)

 

Tua hun ma-in  Gupngahna dingin kei ma sepna them khat beek a kihelkul dingin ka ngaihsun hi. Kei pen zu khamkham, mawhna tawh kidim mi  khat ka hih manin ka kilam-en zo kei hi. Hih  anuai a, Pasian kammalte in hong lungmuang sak le tha hong pia mahmah hi. (Tua ciangin amaute in lamdangsa mahmah uh a, “Tua bang hileh kua in hotkhiatna ngahzo ding ahi hiam?” a ci uh hi. Jesuh in amaute enin, “Mihingte a dingin hi zo lo mah hi; ahi zongin Pasian a dingin ahi mawh thu hi lo hi; Pasian a dingin na khempeuh hithei hi,” a ci hi. MARKA 10:26‭-‬27 TDB)

(Khrih Jesuh, mawhneite a honkhia dingin leitungah hong pai hi, cihna thu a man hi a, a uphuai a sanhuai thu ahi hi. Keimah zong tua mawhnei mite lakah a mawhpha bel ka hi hi. 1 TIMOTI MASA 1:15 TDB)

 

2006 Oct kha-in Muslim gam ahi QATAR ah sum thalawh dingin ka pai lamin, Rev. Suanno EFCM in Yangon ah tui hong phum  hi. LAISIANGTHO bu khat ka zinna  ah ka pua pah a, nisim nasep hun le lup hun lo buang PASIAN  kammal ka sim den a, ka lung ngaingai den hi.  Ka khaan sung uhah Kawlgammi kei bek ka hi a, tua gamah Khristian khat zong om lo lailai hi.                                                                                                           

 

2007 Feb-in ka nu in ka khua uh pan hong nusia  hi. Ka taneupen Sangpi  PITUHSIZONE zatopi ah Oxygen bek tawh nungta, cih ka Zi in fon pan hong ngen a, ka lun sim bei mahmah hi. Job in ni khat sungin thusia bekbek a zak gawp ka phawk hi. (Hih thu a zak ciangin Job dahlua-in a puan balkek a, a sam met khia-in leilakah bok sukin Pasian a bia hi.

JOB 1:20 TDB)

 

Ka lungsim kitam zan dikdekin ka belh ding dang om lo, PASIAN bek mah ka muan ka koh ding a om bek hi. Tua ahih manin sun khat [lunch time] tawlngak  hun sungin nasepna innkhan sung khatah keiguak pai-in PASIAN kiangah thu ngenin misite  thosak kik thei a, pianpih mittawte khua a musak kik thei, lungsim a en tel PASIAN, singlamteh tungah hamsiatna khempeuh hong zawhsak ka TO JESUH aw,  tu-in ka lungkham lua hi, hong huh in, ci’n ka ki ko gawp hi. Tua  leh, tha khat a ka luzaang pan khuavak bang ahi  huihlom dan khat in hong mutpai-in sual tungah ka boksuk a ka khitui tolh zihziah hi. Tua hun tomno sungin a  beisa a ka siat  nuntakzia khempeuh video et bangin, hong mu kiksakin nakpi takin hong kisik kiksak hi. 

 

Tua ni-in hong nusia sa ka PA kammal khat ka phawk hi. Ka PA’ kam nunung khat ahi “Ka ta aw, na kikhel na ding, na dau pai nang, na hauh na ding,  thu hong ngetsak ing, tuate kei piak theih hi lo hi. Ahi zongin  na  lungsim khempeuh tawh PASIAN mai na zon nini-in na hau ding hi,” hong cih, ka phawk hi. (Ahih hangin tua lai panin Topa na Pasian uh na zong ding uh a, na lungsim khempeuh uh le na nuntakna khempeuh uh tawh na zon uhleh amah na mu ding uh hi.

THU HILHKIKNA 4:29 TDB)

 

Tua zawh a sawt lo-in ka zi ka hopih cil ni-in, tu-in pasal thak na nei hi, ci-in ka kap hi. I tate tungah Pa thak neita uh teh, na ci in, ci’n ka vaikhak pah hi. Kong ciah ciang, zu khamkham pa hi nawn lo ding hi’ng, kilamdang mahmahna khat na nei ing,  ka ci hi. Hauhna a cih in sum a gen hi lo-in, Jesuh sunga lungnopna a ngen hi dingin ka um hi .  [ TDB77 Isaiah 26;3 TOPA aw nang hong muang a, nangma tungah a lungsim kip mipa, lungnopna kicing na pia ding hi.] Ka khuadak toh kik ciangin ka lungnop cih takin hong nuam henhanin ka van zang mahmahin ka khasum bang [ Rizal 500] bek  pen ka hawmthawh nawn kei a, TOPA’N hong kicing sak ding h,i ci’n ka um a, ka lung nuam mahmahin ka tha a lawp mahmah lel hi.

 

Hi bangin PASIAN thu maan telin, siatna namkim, mi kih huai dinmun pan kikhelin  ka lungtang tuisuakin ka khamit a vak theihna pen ka ZI in khitui tampi na tuh khitna hang zong ahi hi. Piangthak sa mite thunget sakna zong hi-in, ka PA mahmah in zong a nuntak hun sungin thu hong ngetsak denna hang ahi hi.PASIAN in tu ni ciang dong, ko innkuan hong ompihden hi, cih teci ka pan uh na tampi mitmuhin zong om lai  hi. Hih lai a sim mimal tungah TOPA’ ompihna thupha hong tung kim tek ta hen. AMEN

 

             ……………………………Laisim mimal vekpi tung lung dam  ………………

Post a comment

This site uses Akismet to reduce spam. Learn how your comment data is processed.

Print your tickets