VISION | MISSION
PASIAN THU A THEINAILO MITE THEIHSAKNA MUN.
DEMOCRACY TAWH KITUAK A PAWLPI KI MAKAIHNA DING.
HONG KHANGTHAK NAUPANG TE, ZOPAU LEH ZOLAI TAWH PASIAN A BIAK THEIHNA MUN.
HAMSATNA LEH VAITUAMTUAM TE KIMAKAIHNA DING.
SUAKTA TAK A ZOPAU TAWH A NUNGTA PASIAN BIAKTHEIHNA MUN.
History | Pawlpi Tangthu
Kum 2015 ciang dong Bowling Green khua ah pawlpi khat bek om himah ta leh, Pasian biak nopdan leh ki makaih dan ki batloh ciangin, Pasian geelna leh lam honsakna tawh 21 March 2015 in Pa Thang Khawm Pau te inn ah a masa pen meeting ki nei a, meeting thukimna tawh ki zui in 29 March 2015 kum in Zomi Agape Pawlpi ki pan khia hi. Pawlpi ki patna ding in Pasian zat inn (8) teng tawh a hihi.
- Pa Langh Khen Thang
- Pa Gin Ngaih Khup
- Pa Thang Khawm Pauzomi
- Pa Kham Kap Thang
- Pa Pu Ta Lu
- Pa Piang Hau Lian
- Pa Thang Sial Khup
Pa Kam Lian Thang
Pasian in ZAC thupha pia in, Biakpiakna zong nuam kisa semsem in piakkhiatna a kipan, Topa nasepna ah thahat semsem uhhi. Biakinn kikhop na ding kimu nailo ahihman-in, Upa Khenta te in a inn uh phaltak in hong kawm uh a, tua mun ah kha (3) sung biakpiakna ki nei to hi.
Tuucing omlo tawh Pawlpi kalsuanzia tampi tak hamsatna om ahih man-in, Rev. Dr. Thang Za Kap in siampi nasem in Sia Sawm Thang huh Sia khasumlalo in hong sem a, Zomi Agape Pawlpi hong picing to semsem hi. Pasian in thu ummite a munmun pan hong puak in, pawlpi mi ki behlap in, Pa Khen Ta te inn ah ki ta nawnlo ahih man-in, Pa Ngaih Khup te inn ki ngen a, kha (2) sung phaltak in hong zang sak hi. Pasian hehpihna tawh tua lai-ah ki ta nawnlo ahih man-in Holiday Inn ah nipi (2) kikhop ki nei hi.
Kumsim in Pasian hoihna kimu toto a, thu ummi a nini in hong ki behlap to ziahziah a hih man-in, biakinn zon loh hong phamawh a, Upa Sial Khup leh Upa Thangpi te in nawhtak hong zong pah uh a, a sawt lo-in, Hillview Heights Biakinn a deikhat hong ngah khia uh hi. Hih Biakinn sungah kikhop sung tawntung pawlpi te in biakinn saap piakhat zong hong lalo uh a, a kisam bangbang in hong panpih in Khazih sungah, Innkuan khat banglian hong baan ah, kizopna nuam mahmah uh hi. Kamsia kamkha hong pau ngeilo baan ah, zahtakna leh itna takpi tawh hong panpih tawntung uhhi.
Hih biakinn mun ah kum (2) kiim kikhop khitciang in mipi kita zo nawnlo leuleu ahih man-in, adang biakinn khat zon loh hong phamawh ta hi. Broadway Methodist Pawlpi te biakinn sum tawh kisaap kik a, biakinn thak neihdong tua mun ah biakpiakna ki zom to hi.
Topa ompihna tawh kum (5) sungin, ZAC Pawlpi Inn (8) pan Inn (90) dong Topa’n hong tonpih a, mi (17) ki tuiphum in, Camp (2) vei, Cialpi (3) vei, Seminar (2) vei cih bang in Kum (5) sungah ki neito a, Mission mun (6) ah mi (6) kikhahkhia hi. Tua ban ah, pawlpi mintawh cimawh hihna tuamtuam a kipiak ban ah Topa in kum (5) a cin kum in biak innthak sitset khat hong lam zosak hi.
Pawlpi Sung Vai Puak Zia
ZAC Pawlpi in, Pasian phuhsa pawlpi ahih man bang in, “Ka Pawlpi”, “I Pawlpi” ki cilo in, Pasian pawlpi kici tangtang a, tuamah bang in zong thu neituam innteek tuam cihbang kuamah omlo ban ah, Sia te leh Upa te’n amau sepding ciat sem uh a, Mipi in thmangtak leh kilungtuak tak in kizui diamdiam hi.
Nopna dahna ah Innkuankhat lian bang-in ki nuampih leh dahpih in, kithuakkhawm pi ciat hi. Pawlpi mi hong luut masasa in hong luut khitphet in innteek lungsim neipah a, suakta mahmah hi.