PAWLPI THU BULPHUH: A lungdam mite lungdampih unla, a dah mite dahpih un. (Rom 12:15)
PAWLPI KALSUANZIA:non- denomination
PAWLPI THUBULLETTE
LAI SIANGTHO: Thuciam Lui le Thuciam Thak in mite’ tunga Pasian’ hong kilahkhiatna hi-a, Pasian lungsim pan Kha Siangtho hu muama kigelh ahih manin khialhna kihel lo, up ding le zuih dingin a kicing Pasian’ Kammal ahi hi. Pasian kammal za ah za ki-umin kisang hi. (2 Tim. 3:15-17; 1The. 2:13; 2Pet.1:20-21).
PASIAN: A maan Pasian khat bek in ‘Ama’ thu-a om tawntung “KEIMAH” ci-in amah le amah hong kilakkhia hi. Pa, Tapa le Kha Siangtho-in zong hong kilak hi. Pa, Tapa le Kha siangtho, To thum Pasian khat ahi hi. (Thkn. 6:4; Is. 43:10-11: Mat. 28:19; Lk. 3:22;Pian.1:26).
PA PASIAN : Pa Pasian in eite hong it Pa, A Siangtho Pa, Vangliatna tawh kidim Pa, Na khempeuh a thei Pa, A om tawntung Pa (Matt.3:17;Sawl.7:55;John.1:1)
ZEISU KHAZIH : Topa Zeisu Khazih in a om tawntung Pasian’ Tapa ahi hi. (Lk.1:35) .Lai Siangtho in; Kha Siangtho tawh nungak siangtho sung pan mi bangin a suahkhiatna (Matt.1:23) Mawhna nei lo-a nuntakna (1Pet.2:22, 2Cor.5:21; Hebrew 4:15) Na lamdangte a bawlna (John 2:11, John 6: 13, John 11:41-44) Eite’ taang a singlamteh tunga a hong sihna (Rom.5:8; Col 2:14 – 15). Sihna pan a pumpi mahmah a, a thawhkikna (Matt.28:6; Lk.24:39;1Cor.15:3 – 7) Vankahna le Pasian taklamah minthanna a ngahna (Sawl.1:9,11, Sawl.2:33, Fil.2:9,11, Heb.1:3) A pumpi mahmahin hih leitungah minthanna le vangliatna tawh hong paikik ding (Mang.20:4)
KHA SIANGTHO: Kha Siangtho pen Topa Zeisu hong kamciam a tangtung sakna ahi hi. Thu-um mite hong ompih ding, Thuman hong lak ding, hong huh ding le hong hehnem Kha Siangtho ahi hi. (John.14:16;26; John.16:7-8; Eph 1:13-14;John 15:26;Acts 5:3- 4)
TO 3 PASIAN KHAT : PA PASIAN, TAPA PASIAN, KHA SIANGTHO PASIAN, TO 3 PASIAN KHAT cih ki-um hi. (2Cor.13:14; John.14:16; Matt.28:19; Eph.2:18; Pian.1:26; Isa.6:8)
PIANSAKNA : Na khempeuh, na khempeuh a piangsak PASIAN Vantung le leitungah a om na khempeuh Tui le lei a sunga om na khempeuh PASIAN in Piangsak hi. (Pian.1:1,John.1:3;Heb.11:3;Col.1:16;)
MI : Mi kipiansakna: A kibawl cilin mihing in hoihin, thumanin kicing hi; bang hang hiam cihleh Pasian in, “Eite’ lim le mel sunin mi bawl ni,” ci hi. Pasian in numei le pasal bawl hi. (Pian. 1:26-27; 2:17) Mi mawhna / mi thuman lohna: Ahih hangin mihing in ama’ teeltawmna tawh hong mawhna, pumpi sihna bek hi lo, Pasian tawh kikhenna ahi kha sihna zong hong thuak hi. (Pian.3:6;Rom.3:23,5:12-19).
GUPKHIATNA : Pasian’ Tapa Jesuh Khrih sisan kibuakna sung bekah Gupna le mihingte kihotkhiatna nading lametna om hi. Mawhna maisakna in Jesuh Khrih sisan hang bek hi. (Efe. 1:7-8; Heb. 9:22). Gupkhiatna ngah nading: Kisikkikna tawh Pasian lam zuana Topa Jesuh Khrih upna hangin Pasian hehpihna tawh Gupna kingah hi (Lk. 24:47; Joh. 3:3; Rom. 10:13-15; Efe. 2:8, 9; Tit. 2:11; 3:5-6) Gupkhiatna ngah lam kilatkhiatna Kha Siangtho mahmah I lungsim sunga i kha tawh teci hong panna pen Gupkhiatna ngah lam, sung lam kilatkhiatna ahi hi (Rom. 8:16). Pua lam kilatkhiatna pen thumaanna le siangtho taka nuntakna ahi hi (Matt.5:16;Efe. 4:24; Tit. 2:12-14; 1 Joh. 3:2).
PAWLPI NGEINA
Tui sungah kiphumna : Lai Siangto sungah tui sunga kiphum dingin hong kisawl hi. Thu-ummi, gupna ngahsa khempeuh tuikiphum ding hi. Mawhna sungah Jesuh Khrih tawh sikhawm a, dikna le nuntakna thak tawh nungta dingin Jesuh Khrih tawh a thokhawm ka hi, a ci mite in mipite mai-ah lahkhiatna-in tuiphumna kizang hi (Mat. 28:19; Mk. 16:16; Sawl. 10:47, 48; Rom. 6:4).
NEKKHAWM : Khomun le lenggah tui zanga Topa nitak an nekkhawmna-in Topa Zeisu Khazih nuntakna I neihna lim ahi hi.(2 Pi. 1:4). I mawhna hangin a thuakna leh a hong sihna phawkna le a hong pai kik nading genkholhna zong hi-a, a hong paikik mateng thu-ummi khempeuh in a bawl zel dingin hong vaihkhak hi (1Kor. 11:23-26;1Cor.11: 23-26; John 6: 53- 58, Luke 22: 19-20)
KHA SIANGTHO SUNGA KIPHUMNA
I Topa Jesuh Khrih hong sawlna bangin thu-ummi khempeuh in a hong ciamsa ahi Kha Siangtho le mei sungah kiphumna neih theih hi-a, lamet cinten ding le zon vinven ding ahi hi. Nungzuite le Pawlpi masate hun lai-in hih pen a neihkim uh ahi hi. Tua tawh nuntak kalsuanna, nasep, kalsuanna le nasepna dingin vangliatna hong kipia-a, Pasian nasepna dingin Kha Siangtho letsongte (thuphate) zong hong kipia hi (Lk. 24:49; Sawl. 1:4, 8; 1 Kor. 12:1-13). Hih pen pianthak khit cianga hong piang hi pana, pianthakna tawh kibang lo hi. (Sawl. 8:12- 17; 11:16; 15:7-9).
KHA SIANGTHO SUNGAH KIPHUMNA A KILATKHIATNA
Kha Siangtho tawh kiphumna tungtawnin: a. Kha Siangtho vangliatna tawh lim le nalamdangte piangin, lungdamna thu kizelsak ding hi (Mk. 16:15- 20; Sawl. 4:29-31; Heb. 2:3-4). Pasian biakna ah lungdamna le kicinna omsak ding hi (1Kor. 2:10-16; 12:13; 14:1-40).Thuciamthak hun Khrih pawlpi taktak ahih theih nadingin Kha Siangtho gah le letsongte (thuphate) zangin Ama’ nasepna lawhcingsak ding hi (Gal. 5:22- 26; 1Kor. 14:12; Efe. 4:11 12; Kol. 1:29).
SIAN’THONA : Sian’thona I cih in a sia tawh kikhenkhia-a, Pasian lam belh cintenna ahi hi.(Rom.12:1-2; 1Thes.5:23). “Tua sian’thona a om kei leh kuamah in Pasian a mu thei kei ding hi”(Heb.12:14b). Thu-ummi in Khazih sihna ah sikhawmin, a thawhkikna ah thokhawma nungta ahih lam kithei-a, tua pumkhat suah khopna thu nisimin ciamtehin, Kha Siangtho’uk dingin a pumpi nate khempeuh a piak tawntung ciangin tua siangthona hong piang thei pan hi. (1Pet.1:14,16;Rom.6:1-11,13;Gal.2:20;Phi.2:12)
THUPHA LAMETNA : Khrih sungah a ihmusa mite thokikin, Topa hong pai dong a hing lai mite tawh laktohna ngahkhop nading hun ahi misiangthote laktohna (Rapture) in a hong tung pah thei ding Pawlpi’ Thupha lametna ahi hi (1Thes. 4:16-17; Tit. 2:13; 1Kor. 15:51-57;Sawl.20:11- 15).